الزواج الثاني اصبح ضرورة



 
[rtl]السلام عليكم[/rtl]
[rtl]انا بعتلك يا أستاذة نيفين بعد ما فاض بية والله .[/rtl]
[rtl]انا متزوج من ست سنوات واتجوزت عن حب ولسة بحبها لكن حياتي اتقلبت هرجلة وقرف من كسلها وقلة ما بتسمع النصيحة .. مراتي لا يمكن تصحى بدري ويوم ما بتقوم بدري من النوم بتبقى الساعة بقت خمسة يعني أكون راجع من شغلي بقالي ساعة وطبعا ارجع ما الاقيش غدا والبيت مكركب من قبلها بيوم والمطبخ كله في الحوض والحمام شرحه .. صعب جداً كل يوم في الموال ده ومفيش كلام بينفع .. عملت كل المحاولات وفشلت أقنعها ان حياتنا بتنتهي .. وكلمت والدتها كتير جداً والصراحة والدتها في صفي لكن بدون نتيجة .. هية مصرة أنها تعيش اكنها لواحدها في البيت وطبعا تفضل سهرانة لغاية وش الصبح قدام التلفزيون او النت وبكون انا نمت علشان شغلي تاني يوم والمصيبة أنها هية اللي بتشتكي مني اني مش بخرج معاها .. طيب لو عايزين نخرج مش تقوم في وقت معقول ونتغدا سوا زي البني أدمين ونريح شوية بعدين نخرج ولا الهانم تبدأ تفكر تشوف شوية شغل البيت بالليل وياريتها بتخلص توضيب !!! ده البيت يضرب يقلب لان مقاييس النظام عندها مختلفة بتعمل أي حاجة تأدية واجب وخلاص .. المهم انا قرفت خلاص ومش قادر أكمل بالمنظر ده وانا قلتلها كذا مرة قبل كدة اني هضطر أتجوز عليكي تقوم ترد عليه تقول ( طيب وريني هتعملها ازاي عشان أكون سايبالك البيت ) [/rtl]
[rtl]انا عايز اعرف هوة فين البيت ده وهل انا غلطان لو اتجوزت عليها ولا لا .. لا اعتقد ان فيه ست تانية بالاهمال ده ولا راجل تاني هيستحمل كدة !!!! بجد لابد من جوازة تانية تريحني وتحسسني اني إنسان وزوج وراجل ومرتاح .. وإلا الناس بتتجوز ليه ؟! [/rtl]