مرحبا بك يا زائر نحن سعيدون جدا بتشريفك منتدانااملين الا تتردد فى انضمامك الينا ودعوة اصدقائك للتسجيل والمشاركه معناواهلا بك بيننا فى صرحنا المتواضع

لقد وجدنا القتيلة ......!!!!

لقد وجدنا القتيلة

لاحظت تجمع غير مبرر لدى أمام بيت العمدة ، فالناس عندنا لايجتمعون بهذه الصورة سوى فى الأعياد ، دفعنى الفضول لأقف بين الأقدام والأنفاس لعل أذنى ترى ما لم تره عينى وتعرف الحقيقة ، صدمنى جارى أبوالفضل عندما أخبرنى أنهم وجدوا قتيلا ملفوفا فى أكياس والعمدة بالداخل يبلغ الحكومة ، استفزتنى الكلمات وأثارت داخلى الفضول أكثر ، فهاجمت أبوالفضل بسؤال ......
- وما نوع القتيل ؟ أقصد راجل وللا امرأة
- محدش يعرف .... أصل الواد ابن فواز كان قاعد على شط الترعة بيصطاد لقى الشوال قدامه مد إيده عشان يعرف اللى فيه لقى جثة ميت ، اتصرع وجرى فى البلد يصرخ قتيل يا ناس الحقونى ... قتيل يا ناس الحقونى .... قام العمدة بعت سعدون الغفير للترعة عشان يمنع الناس لحد ما الحكومة تيجى ..... ومحدش عارف حاجة . توجمت الوجوه ووقفت الأنفاس عندما خرج العمدة وعلى وجهه علامات الخوف من المجهول ربما كان القتيل من قريتنا ، صاح العمدة فى المتجمهرين
- اقعدوا لحد ما الحكومة تيجى ونشوف البلوة دى هترسى على أيه ....
- بأذن الله يا عمدة هترسى على خير.
- خير ... !! هويجى من وراك خير أنت وابنك يا فواز فاكر السنة اللى فاتت لما اتعركت أنت وعبدالمنعم عشان حبة ميه .. ياراجل أقعد بلا خيبة .
يجلس فواز صامتا ،جذ العمدة على أسنانه وهرش برأسه وخده الأيمن واحمرت عيناه وقال مرة آخرى....
- يلعنكم .. ويلعن اليوم اللى بقيت فيه عمدة عليكم ... محدش يعرف حد من البلد مش باين من فترة .....
علت الأبصار نحو السماء وفركت الجباه وعضت الأصابع لعلهم يتذكرون الأشخاص الغائبين عن البلدة منذ فترة ، صاح عبد الجليل الغشيم
- عرفت مين القتيل يا حضرة العمدة ... والله العظيم عرفته ....
- قول بسرعة يا واد ... الله يخرب بيتك قول ....
- مفيش إلا عبدالتواب هو اللى قتل أخته صفية ... البنت بقلها ثلاثة شهور كل يومين ثلاثة تروح مصر وتغيب يوم تلقيها والعياذ بالله ...

- اسكت الله يخرب بيتك .. عبدالتواب وأخته صفيه الله يكون فى عونهم .. ده لسه جاى لى من أسبوعين عشان يبيع الأرض ويعمل عملية الكلية لأخته صفية العيانة اللى بتغسل كليتها كل تلت أربع أيام ... وأنا قلت له خد الفلوس سلف وخلى الأرض بتعتك ... أنت مش بس غشيم وطلعت بهيم كمان ......
تتعالى الضحكات والسخرية على عبدالجليل ، تعالت الأصوات التى تناديه بالجلوس قائلة أقعد يا بهيم .. عاد الصمت ليخيم على المكان ، وزاد الفرك فى الجباه ، فوقف عبدالجليل مرة آخرى صائحا ..
- والله العظيم المرة دى بجد أنا عرفته
- قول يا فالح وللا قولك قول يا بهيم
- يا حضرة العمدة تلاقيه فوزى بن أبوالغيط خد جرعة زيادة من الهباب اللى بيشربه ومات وصحابه رموه فى الترعة ....
تتعالى الضحكات والسخرية على عبدالجليل ويضحك العمدة
- ابن أبوالغيط ده ميت بقاله خمس شهور ياحمار ياجحش
تعود مرة آخرى الألسن إلى الصمت ، لكن الأبتسامة مازالت تعلو الوجوه ، تفكر فى من يكون القتيل ... يعود عبدالجليل صائحا مرة آخرى ..
- والمصحف ورحمة أبويا دى مش هتخيب معايا أبدا .
- قول يا أبوالعريف ... مين المرة دى.
تتجه الأنظار إلى عبدالجليل منتظرة إبتسامات وضحكات آخرى .
- مفيش إلا الواد صلاح بن إعتماد تلقيه سرق سريقة والحرامية قتلوه وللا صاحب البيت اللى سرقه ....
يقف العمدة كأن كلام عبدالجليل قد دخل رأسه وأومأت الرؤوس بالموافقة على كلامه هذه المرة فالواد صلاح حرامى من زمان وبيقولوا الحجر الداير لابد من لطته ، ولكن عبدالودود الخفير صاح فى عبدالجليل
- الواد صلاح بن اعتماد بقاله سنتين فى السجن ومش هيطلع إلا بعد خمسة سنين كمان يابهيم يا ابن الغشيم
تزداد الصيحات و الضحكات ويجلس العمدة مرة آخرى ضاربا كفا بكف ، تلجم الألسن وتزداد العيون ملاحقة لعبدالجليل لعله يصل إلى الجانى
- بحق وحقيقى القتيل ده ابنى أنا اللى قتلته عشان قلت له هات لى فنجان شاى جاب كباية ماأصل أنا مبحبش اللى ميسمعش كلامى
- كلامك ايه يا حمار هو أنت مجوز وعندك عيال
- أخ كانت تهيا عنى دى يا حضرة العمدة
تتعالى الأصوات بالضحكات وتتحول لحظات إنتظار الحكومة إلى ضحكات على عبدالجليل الذى وقف مرة آخرى قائلا
- ميكنش الواد .....
- اسكت يابهيم يا ابن الغشيم الحكومة وصلت وهتقول لنا مين القتيل
يجلس الضابط بجوار العمدة ويأمر الخفير بتفرقة الناس ، الناس تصر على معرفة القتيل يأمر الضابط الناس بالتفرق فالقتيل ليس سوى ..... لم استطع سماع صوت الضابط من كثرة الضحكات التى صدرت من الناس على فواز وابنه ، يصعد صوت عبدالجليل
- بعد الفحص والتمحيص ..... لقد وجدنا القتيلة معزة ...

شكرررررررررررررا
لقد وجدنا القتيلة ......!!!! 641947

مرحبا بك يا زائر نحن سعيدون جدا بتشريفك منتدانااملين الا تتردد فى انضمامك الينا ودعوة اصدقائك للتسجيل والمشاركه معناواهلا بك بيننا فى صرحنا المتواضع

اللهم انت ربى خلقتنى وانا عبدك وانا على عهدك ووعدك ما استطعت اعوذ بك من شر ما صنعت وابوء اليك بذنبى فاغفر لى انه لا يغفر الذنوب الا انت

لقد وجدنا القتيلة ......!!!!