ياللا حالاً بالاً حيوا معانا أبو الفساد



في عيد ميلادك الكام وثمانين

أسود يوم في تاريخ مصر 4 مايو 1928

سيدي الرئيس
في عيد ميلادك الكام وثمانين
كل سنة وانت طيب
واحنا مش طيبين
كل سنة وانت حاكم
واحنا محكومين
واحنا مظلومين
واحنا متهانين

******************

يا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - ها تفتكر مين وللا مين

في عيد ميلادك الكام وثمانين
بقول لك كلمتين :

******************

الأوله ... ليلتنا طين
وهل تعلم أن النيل بقي رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والإقتصاد سداح
والسرقة بقت كفاح
ومصر متاحة بس للسياح
وعرض البلد بقي مستباح

******************

والثانية ... ورتنا الويل
دا الخطوة في عهدك بقت ميل
والضحك بقي نواح وعويل
والكوسة ... عارف الكوسة
ممكن أقول لك فيها مواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز علي المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين

******************

والثالثة ... عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسه مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين

******************

والرابعة ... أمن بلدنا بقي نتنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين

******************

والخامسة ... القطاع العام .....عام
والفساد.....ساد
وفي جتة بلدنا بيرعي
أفتكر لجنابك إيه وللا إيه
وكل ذكري ليك بدمعة

آآآآآآآآه آآآآآآآآه
أنا كنت حالف مية يمين
أكملهم لك أثنين وثمانين
بس ها كفيهم ورق منين
وكل سنة وانت ....................
واحنا طيبين
__________________

ياسلام ياشيرى موضوع جميل ياعم مشكور وهى دى حال البلد


نورت المنتدى ياباشا

هههههههههههههههههههههههههههههههه جميلة

موضووووووع جميل شكرا لك

ربنا يستر يازعيم شكلنا رايحين فى داهيه معاك ايه الحلاوه دى اه انتى مسنود ياعم احنا مش ادك

اكتب تلك الكلمات بقلب مفعم بالحزن والاسى على ما حل لبلدنا من ظلم وفساد واستعباد واقول اننا بايدينا صنعنا هذا كله نعم نحن سكتنا على الظلم والطغيان سكتنا على الفساد والاستعباد وهذا مصيرنا .اين نحن من العالم ؟ليس لنا شكل ولا كرامة ولا كيان انني حزينة كل الحزن على حالنا ،واتمنى من الله العلي القدير ان يرفع عنا مقته وغضبه وان يرحمنا مما نحن فيه .اختكم ندى الإيمان.