إزاى احبك يابلد وانتي مش حباني

رائعة أحمد فؤاد نجم الجديدة





ازاى احبك يابلد وانتي مش حباني

إزاي أعيش وأموت وأندفن في أرض رفضاني



بنام وأحلم ببكرة الأقي بكرة زود أحزاني

أه يا بلد لو بإيدي كنت أهدك وابنيكي من تاني



بيقولك تعديل دستوري إحنا عايزين تعديل إنساني

كل إنجازات البلد أنفاق وكباري

بلد بتموت وشعب فى حالة سكوت وكانها لعبة اتاري

من كتر الظلم والضلمة بقول ياريت ايام الملك والانجليز ترجع تاني



أه يا بلد مليت بحبك الدفاتر مع العلم أنك قتلاني

مين اللي قال أن "عبارة السلام" غرقت

ومين اللي قال أن ممدوح إسماعيل قاتل وجاني

اللي غرقت مصر واللي غرق ما بيطلعش حي تاني

هو يطلع من صالة كبار الزوار وأنا اتحبس في سجن المطار واتعرض على البحث الجنائي



انا اللي من صغري أخترتك سكتي أتريها سكة أحزاني

أنا اللي من صغري أخترتك كلمتي ألاقيكي مقيداني

أه يا بلد نفسي قبل ما أموت الاقي زمانك وزماني

إتغربت أكتر من سبع سنين ورجعت لاقيت الغربة هنا شكل تاني



بلد بتعاني بكل المعاني بكياني وانا أملي أحس بكيانى

عشرين سنة مخلص محبوس بين جدران دكاني

نفسي أعيش من غير ما أنافق السلطان والسلطاني

نفسي أعيش من غير ما أنافق ولا حتى أبويا اللي رباني



بكرة نتحاسبو علي السكوت وعلى العيشة العمياني

إبني مكملش سنتين نايم جنب مني بيشد في شعري ويحط صبعه في وداني

ويضربني بالقلم ولسان حاله بيقول ليه يابا خلفت تاني

وأنا في سري بأقول ياريتك يا أحمد يابني ياباني إبن ياباني



مع إن وجودك في الدنيا عمل فيا وخلاني

أحب البلد أكتر وأهد جدران دكاني

شيخ الأزهر بيقول المعارضة حرام

وانا نفسى أعرف آية الحلال فى بلد الميت مليون حرامى

ازاى صحيح